أبد لاتسألين بغربتي عـن آخر الأخبار
... عمت عين السفر دامي أذوق المر من كاسه !
أنا اللي بسألك قولي .. جواب بكلمتين صغار
.. بلد من دونك ( اش ) يسوى بعيني !؟ يابعد ناسه ,
بدونك .. ما أطيق البعد لو هو بيننا أمتار !!..
ولكن هالفراق أقوى ولاينفع به سياسه ..
ترى لولا اتصالاتك .. برغم اللي يدق ..
كثار ,
حشى مافيه أحد غيرك يرد لصدري أنفاسه ..
ألا ياشوق خفاق ٍ ضويتي ظلمته أنوار ,
وصار اليوم ينبض لك مشاعر حييييل حساسه ..
تبي تدرين بفراقك معي يا الغاليه وش صار !؟
.. تبي تعرفين مجنونك وش اللي قالب ٍراسه !؟
لك الله عايش بحالي/ لحالي .. شاعر ٍ منهار ..
وأنا كل ما طريتي لي صرخ شعري بقرطاسه !
يمر يومي .. ولابه غير همي والحزن زوّار ,
عسى الله يرحمه حال ٍ غدا هالثنين جلاسه ..
شحن جوالي أنهيته !! أقفّل.. وافتحه أمرار
!!قسم لولا رسايلنا .. حبيبك قاتله ياسه ,
فقدتك والدمع لامن ذكرتك يفضح الأسرار ..
ولا أشره على وقت ٍ به الأيام دساسه ..
أسلي نفسي بكثر الأمانـي .. واليدين قصار ,
وأنام وربي العالم وش اللي خاطري حاسه !
كأني من ملك أسهم يبي تضحك له الأقدار ..
وقدّم كل ماعنده .. وفجأه أعلن إفلاسه !!
كأني طالب بغربه .. تذكّر عيلته والدار ,
وهو كل ماذكر أمّه ملا هالدمع كراسه ..
أعاني كثر ماتملك ومالك بالحشى تذكار ,
.. و ( أحبك ) والبلا حبك أبد ما أملك قياسه ..
جعل في داخلي عرق ٍ سمع بك يا الغلا ماثار !
يموت .. و وش لي بعرق فـ وصالك ميّت إحساسه !
حياتي تسأليني عن جديدي بالشعر وأحتار !؟
.. وش أكتب لك شعر وانتي غديتي اليوم نبراسه !
ولكن أوعدك شعر ٍ لاقوله يتعب الشعار ,
متى ماشفتك وموعد لقانا دقت أجراسه ..
لأن مافيني أتحمّل بعادك في سفر وانهار ..
... عسى لايعيدها سفره .. ولو هي كانت دراسه !
لـِ الشآعـر : عبدالله الظفيري
مـــودتــــي ..